Felicem Annun Nouum MMXI!


Carmina Latina de "Anni temporibus"


1. Hieme
Systema: alcaicum

Tarde cadebat nix. Rutilas focus
flammas alebat. Candor erat polo.
In corde mansit palpitante
dextra tuo mea. Nix cadebat...

2. Vere
Systema: asclepiadeum

Maturas, iuvenes, carpite iam rosas,
festes serta decent. Herba vocat gradus.
Turtur sub platano concinit abdita.
Laetantur tenero flumina gramine.

3. Aestate
Systema: asclepiadeum maius

Titan urit humum. Pax ubivis. Sicca meridies
terrens rura tenet. Crebra gregem protegit arbutus.
Ulmus stat viridis, flava seges, rufa papavera.
Sero stella venit multa ferens oscula amantibus.

4. Autumno
Systema: sapphicum

Uva flaccescit, vetulus flet aeger.
Nubilat. Spargunt croceum tapete
flabra. Ranarum tenuis querella
nuntiat umbras.

***

Comentarios

  1. Anónimo17:36:00

    Pulchra et viva sunt haec carmina. Omnes sensus natura cuiusque aetatis implent.

    ResponderEliminar
  2. Irrama12:58:00

    Cenabis et celebrabis bene, mi soror Sandra,
    apud me paucis, si tibi di favent, minutis,
    nouum annum MMXI...
    si tecum attuleris bonam atque magnam
    cenam, non sine vino et 'cava' et SALE et omnibus cachinnis.

    Annun Novum MMXI felicem et hilarem vobis exopto
    Propino nobis salutem! :-)
    plurimas gratias Sandra! multa oscula!!

    ResponderEliminar
  3. Sandra Ramos23:44:00

    Si tibi, hospes sine nomine, placuerunt haec carmina a Florindo di Monaco scripta "De anni temporibus", commendo quoque euoluere hunc commentarium De anni temporibus ab Irisato nostro exarato ubi continentur plura carmina pulchra et uiuida.

    Salua sis, PAX mea, pulcherrima rerum, soror Glaukopis! Gaudeo plurimum quod non solum primum intras meum in scriptorium, sed etiam Latine scribis. Salutem tibi et Alhanae et Violae et amicae Baeticae et omnibus lectoribus lectricibusque meis beneuolentibus propino de nouo anno 2011º quem SALIS et PACIS plenum fore spero.

    ResponderEliminar
  4. Anónimo11:44:00

    Gratias! (sum @asineus, qui te pipilantem bene cognovi).

    ResponderEliminar
  5. Sandra Ramos12:52:00

    Placuit mihi plurimum legere annotatiunculas binas tuas, @asineus, sed maxime alteram obsignatam. Neminem enim euoluere nugas quas scribo, semper puto. Perrecturos esse nos iucunde pipilare spero per multos annos!

    ResponderEliminar
  6. Nemo Oudeis18:13:00

    Unum neminem scio semper tua verba docta evolvere. Felicem faustum fortunatum novum annum tibi exopto!

    ResponderEliminar

Publicar un comentario

Entradas populares de este blog

De reditu

   Post dies aestiuos insolitos et uentosissimos et non tam feriatos quam ipsa uoluissem, et postquam iucunde absoluissem quoddam negotium Matritense, quod mense Augusto exeunte mihi faciendum fuit (de quo plura uobis alias aperiam), reditus tamen in Academiam mense ineunte Septembri tam dulcis quam in domum non fuit. Facultatis aura praerancida redolebat. Capsula epistularum electronicarum denuo mihi imminebat plenissimam dum magis in dies complebatur. Academici coetus me exspectabant insulsi. Probationes quoque discipulis paraui easque recens aestimaui, quas plerique superauerunt non inlaudabiles, sed unum exercitium legi uel pessimum omnium quos umquam, nisi memoria fallitur, euolui. Quomodo aliquis philologiae latinae studere sponte cupit et linguam Latiam pulcherrimam magnopere obterere et calcare potest? Unum aut alterum exemplum quasi crimina laesae Latinitatis afferre possem, ut disceretis me non mentiri neque uerba exaggerare. Sed melius est facinus hoc nunc praetermittere e
Leer más

Angiportum perangustum

Imagen
     Nudius tertius frater, qui alio in oppido Baetico procul a me habitat, imaginem quam in parte sinistra inspicere potestis, lectores candidi, ad me per telephonum gestabile nuntiolo electronico misit, captam dum ipse ambulabat, utpote qui nomine viae viso statim mei recordatus sit.    Sine coloribus vel potius luminibus et umbris descripta imago mihi admodum placuit non tantum quod videlicet testimonium amoris fraterni est verum sincerumque, sed etiam quod semper delectata sum imaginibus ope lucis expressis eis quae ex prima fronte visum fallunt.    Nam ubi primum imaginem spectavi, eam inversum positam esse putavi necnon eius prospectum falsum esse, nam pars clarior imaginis quasi caelum esse videbatur, pars obscurior quasi terram sive mare. In loco autem medio lineae parallelae et tranversae secare videbantur horizontem.     Deinde fenestram externam sive potius maeonium labyrinthi a transeuntibus foris intuitum esse existimavi, ubi pars obscurior tamquam tectulum
Leer más

Orbergiana uaria

Imagen
His in diebus ante ferias Natalicias ualde cumulata sum diuersis laboribus. Praeter sessiones scholasticas in auditorio ministratas et coetus academicos usitatos, mihi legendus est inter alios quidam liber de artibus memoriae saeculo XVI scriptis ad existimationem conficiendam quae in lucem edita erit nostris in commentariis periodicis qui Calamus Renascens inscribuntur, necnon mihi petenda est quaedam probatio laboris peruestigandi per ultimum sexennium . Nihilominus, primarum sessionum Latinarum in Gradu "Humanitatum", qui dicunttur, usque ad diem hodiernum rationem ducere placeret mihi quae nonnullos abhinc menses tantum euoluere libros Orbergianos incohaui. Quindecim alumni in matriculam relati sunt eique inter uiginti et sexaginta annos nati, sed in auditorio assidue adsunt decem. Ad summatim laeta sum, quia plerique uidentur discere plus minusue alacriter. Proxima hebdomade probationem feci: tantummodo una alumna reprobata est. Impraesentiarum in studium cap
Leer más