De mammis et papillis muliebribus
 |
| Cerevisia "Mamma" inscripta. |
Nuper ex terra Belgica redii salva incolumisque una cum familia (tredecim cognatis) post varios dies peregrinans per Bruxellam et Brugas et Antuerpiam et Lovainam. Iter iucundissimum fuit, de quo hodie tantum pauca dicam, maxime de quadam cerevisia Belgica, quam illic gustavi cum filia aliisque familiaribus.
Mirati quidem sumus pro cerevisiae nomine et pittacio et imagine, qua lagoena et pocula ornabatur, scilicet mammis et papillis, tamquam si foret aliquid cottidianum et usitatum. Aliquot dies post quam in patriam Hispanicam redii, apud nos controversia quaedam orta est, quia quaedam cantatrix clarissima, dum in concentu canebat, pro mulierum dignitate coram spectatoribus contionata est et defendit libertatem palam monstrandi mammas et papillas, sicut viris haec potestas est.
Multae voces contra hanc feminam sublatae sunt ab eis qui hoc carpebant et plurima in eam legi et audivi insulsa, quae hic scribere nunc nolo. Mammas muliebres ultro monstrare eisdem locis quam viri videbatur ius hodie iam acceptum, sed adhuc multi sunt qui eas palam videre timent aut spernunt, procul dubio propter res Venerias in cerebro hominum radicitus insitas.
De mammis Plinius Maior Aristotelem sequens dixit haec luce solis clara (11, 232):
Mammas homo solus e maribus habet, cetera animalia mammarum notas tantum. sed ne feminae quidem in pectore nisi quae possunt partus suos attollere. ova gignentium nulli; nec lact nisi animal parienti.
Mammae quidem sunt virorum et mulierum, lac autem continentes mammae earum hominum quae animalia pariunt.
Forte fortuna etiam multi viri et feminae fuerunt qui hunc gestum plauserunt, inter quae ipsa numerata sum. Testimonium est haec commentatio, quam vobiscum, lectrices fideles, lectores candidi, compartiri volo.
 |
| Imago sumpta hinc. |
 |
| Eugeni Delacroix "Libertas populum ducens" (1830) |
 |
| Aloysiae Roldanae Virgo lactis (1689-1706) |
 |
| Venus Melia. |
Moderator cupiditatis pudor. Differt a pudicitia, quae in corpore est dum pudor in animo. Differt etiam a castitate qua homo semetipsum custodit a turpitudinis incursibus dum pudicitia ab aliorum obscaenitate arcet. Haec non est opinio mea: satis est consulere lexicon latinum. Ego autem dixissem: corona muliebris decoris pudicitia. Mulier non est vacca.
ResponderEliminarRectissime mones, Andrea: mulier non est vacca, immo homo est, sicut vir. Ceterum nil aliud est pudor quam ob aliquam rem sordidam timor. Quippe ab Aristotele sic diffinitur: αἰσχύνη ἐστἰ φόβος δικαίου ψόγου, hoc est, “pudor est timor iustae reprehensionis”. Et si pudicitia in corpore et pudor in animo est, utraque virtus est hominum, non solum mulierum, nisi viri corpore careant quasi larvae.
EliminarHac in re, venit in mentem sententia sancti Hieronymi scribentis: "Aliae sunt leges Caesarum, aliae Christi: aliud Papianus, aliud Paulus noster praecipit. Apud illos, viris impudicitiae frena laxantur et solo stupro atque adulterio condemnato, passim per lupanaria et ancillulas libido permittitur, quasi culpam dignitas faciat, non voluntas. Apud nos, quod non licet feminis, aeque non licet viris; et eadem servitus pari conditione censetur." (S. Hieronymus: ep. 77)
EliminarErgo apud nos homines quod non licet feminis, aeque non licet viris; quod licet viris, aeque licet feminis.
Eliminar