Carmen primum...

...ei qui mihi praecordia perciet.

Feriae aestiuae iam finitae sunt atque hos per dies mensis Augusti pigritia non mihi concessit maleuola ut nonnihil agerem praeter multum dormire et saepe litus piscinamque petere et aliquando ad scholas gymnicas adire et in unam aut alteram saltationem incumbere et cum familia amicisque amoenissime colloqui et tranquille perambulare et quorundam amicorum scripta legere... Tantum tres quattuorue dies horridissimi mihi fuerunt ob magnum dolorem pulpae dentariae qui me iactauit in lectum morbidam ¡Au quantum cruciatum passa sum peiorem quam supplicium Promethei (ut uerbis mei Angeli Baetici utar)!

Etiam aliquos libros emi quos adhuc euoluo, ut, uerbi gratia, nouum Florilegium poesis Graecae eroticae (Matriti, in domo editoria c.n. "Cátedra", a. 2009º), auctore Iosepho Ludouico Calvo Martínez, Professore Cathedrario Granatensis Studiorum Vniuersitatis, maxime callente Aristotelicis in operibus atque etiam in magia diuinationeque antiquis.

Optima reuera editio uidetur eaque bilinguis, uidelicet Graece Hispaniceque. Quid noui afferat aduersus alia Florilegia Hispanica ut illud paratum, ex. gr., ab Aurora Luque (Matriti, an. 200oº) uel a Gullielmo Galán et Michaeli Márquez (Matriti, an. 2001) uel a Maximo Brioso (Hispali: an. 1991º), plane animaduertitur cum inspiceretur legereturque textus Graecus aduersus suam translationem Hispanicam comitatam multis annotationibus. Vtile enim fore spero ad illam editionem meam epigrammatum humanistae Cascalii, quae hos menses sequentes mihi paranda est. Verbi gratia, epigramma XII 210 Stratonis (51, p. 435), ab Ausonio Latine translatum saeculo IV, sine dubio inspirauit Cascalio, quamuis sub afflatu Musae Christianae, ad eius epigramma concinnadum c.n. "De dubio quattuor amantium praelio", de quo forsitan alio die plura dicam.

Florilegium a professore Calvo Martínez instructum complectitur:

I. Liricam poesem archaicam (Sapphus, Alcaeus Mytilenaeus, Anacreon, Alcman, Archilocus, Mimnermus, Theognis, Ibycus, Pindarus)
II. Drama (Sophocles, Euripides)
III. Liricam poesem helenisticam haud epigrammaticam (Theocritus, Bion, Moschus)
IV. Fragmenta anonyma helenistica in papyro
V. Epigrammata:
V.1. Auctores pertinentes ad Coronam Meleagri (Callimacchus, Nossis, Asclepiades, Posidippus, Dioscorides, Rhianus, Leonides Tarentinus, Nicarchus, Hedylus, Manasalcas, Diotemus, Dionysius, Phanias, Alcaeus Messenius, Polystratus, Antipater Siodonius, Meleager Gadarenus)
V.2. Auctores pertinentes ad Coronam Philippi (Philodemus, Marcus Argentarius, Antipater Thessalus, Parmenio, Archias, Bassus, Automedon, Lucilius, Alphaeus Mytilenaeus, Diocles, Crinagoras, Diodorus, Onestus, Antiphilus, Maacius siue Metius, Euenus, Statyllius Flaccus)
V.3. Auctores habentes Anthologiam suam (Rufinus, Strato)
V.4. Auctores difficilis classificationis (Gallus, Iulius Leonides, Cillactor, Getulicus, Numenius)
V.5. Epigrammata auctoris ignoti in duabus Coronis

***

En uobis quidam uersus a me selectus:

SAPPHO (ca. 600 a. n. Chr.):

-Ἔρος δ'ὲτίναξέ μοι
φρένας, ὠς ἄνεμος κάτ ὄρος δρύσιν ἐμπέτων.

Latinam interpretationem feci eamque disparibus numeris concinnaui:

Improbus ille puer mihi sīc praecordia cīuit,
Vt dē mōnte altō rōbora praecipitans
Ventus turbine quī capita exsternat foliāta.
Cor mihi laesit sīc improbus ille puer.

***

Pigritia tandem aliquantulum beneuolens fuit, quoniam donum mihi aestiuum dedit: poema Latinum in distichis elegiacis ad imitationem poetriae Graecae Sapphus idque, quamuis fortasse mediocre, Alexandrae carmen primum.